For å skaffa seg den legitimiteten som trengst for å kunna gjennomføra den stadig tettare integreringa og maktforflyttinga, vil EU gjennomføra eit nasjonalistisk prosjekt, etter modell frå oppbyggjinga av nasjonalstatane frå 1800-talet. Dei ynskjer å skapa ein europeisk identitet som gjer at innbyggjarane kjenner seg knytte til og kjenner andsvar for å halda oppe den europeiske gruppa i motsetnad til dei som er utanfor.

Korleis freistar EU byggja ein europeisk identitet?

• Dei seinare åra har EU gjennomført storstila kampanjar for å overtyda borgarane om at dei har ein svært tett sams identitet og kultur.
• EU har skaffa seg ein eigen EU-nasjonalsong og eit eige EU-flagg, og held no på med å laga ei eiga EU-grunnlov.
• EU driv propagandaverksemd retta mot born og unge for å innprenta ein EU-identitet. Eit godt døme på dette er teikneserien Captain Euro.
• EU freistar byggja ned dei nasjonale identitetane ved å satsa hardt på regionale prosjekt som går på tvers av landegrensene.

Innanfor den Europeiske Unionen finst to–tre store og sterke nasjonar som alltid har og truleg alltid vil kjempa for å få leggja dei fleste og sterkaste premissane for innhaldet i den europeiske identiteten. For at europearane skal makta å opptre samla utetter, er det naudsynt at eitt kulturuttrykk, til dømes eit språk vert sett over alle andre og definert som europeisk. Deretter – eller eventuelt før – må borgarane samla seg om dette europeiske uttrykket for å gje det legitimitet og gjera at det vert attkjent som europeisk, og denne prosessen må gjentakast på område etter område.

Ein slik prosess vil nødvendigvis enda i einsretting og undertrykkjing av det mangfaldet som i dag kjenneteiknar Europa.